HERRI KIROLAK/HARRIA/INGUDEA

Harri-jasotze eta ingude-altxatze txapelketak Maeztun

2020/11/10

Argazkiak: egursport.com

Hasiera batean Trebiñun aritzekoa bazen ere, azkenean igande eguerdian Maeztuko plazan (Araba) jokatu zen aizkolari, harri-jasotzaile eta ingude-altxatzaileak bildu zituen herri kirol jaialdia.

Binakako harri-jasotze txapelketako saioan,  Aimar Galarraga oriotarra eta Aizarnako Jagoba Otaegi elkarrekin aritu ziren, eguerdiko hamabietatik. 2020 Binakako Harri-jasotze Txapelketa “Gruas Iru Saria”-ren 6. jardunaldia zen honakoa, eta bi aizkolariek guztira 6.842 kilo altxatu zituzten, 59 jasoaldi eginda.

Bi harri-jasotzaileak 175 kiloko laukizuzenarekin, 138 kiloko kubikoarekin, 100 kiloko zilindro zaharrarekin eta 100 kiloko borobilarekin aritu ziren, bina minutuko txandetan.

Aimar Galarragak, 175 kiloko laukizuzenari 8 jasoaldi eman zizkion (1400 kilo) eta 138 kiloko kubikoari 9 (1242 kilo). Jagoba Otaegik bere aldetik, 100 kiloko zilindroari 25 altxaldi eman zizkion (2500 kilo) eta 100 kiloko bolari 17 (1700 kilo).

Bukatzeko, 2020 Emakumezkoen Ingude Txapelketako bigarren jardunaldian Arabako Estibaliz Cidad aritu zen hamar kiloko ingudearekin, minutu bateko bi txandetan. Denera 116 jasoaldi egin zituen, lehenengo txandan 59 jasoaldi eginda eta bigarrengoan 57.

Pasa den asteburuan lehiatutako lehenengo jardunaldian, Garazi Arrutik eta Karmele Gisasola “Zelai III.ak” indarrak neurtu zituzten. Gisasolak 128 jasoaldi egin zituen 10 kiloko ingudean (txanda bakoitzeko 64) eta Garazi Arrutik 118 (txanda bakoitzeko 59).

Maeztuko herri kirol jaialdian, Urrezko Aizkolari Kopako bigarren kanporaketa ere jokatu zen. Lau aizkolari aritu ziren nor baino gehiago (Julen Olano, batera Suharri Rodriguez, Iban Resano eta Luis Txapartegi), azkenean Olanok lortu zuelarik garaipena eta hurrengo kanporaketarako txartela.

Txapelketako lehenengo kanporaketan, Xabier Zaldua, Luis Polanco, Hodei Ezpeleta eta Julen Aranberri aritu ziren nor baino nor gehiago, azkenean Zalduak lortu zuelarik sailkapena.