LASTERKETAK

Gasteiz Duatloia urriaren 10ean egingo da

2021/09/23

Argazkiak: Gasteiz Duatloia

Gasteiz Duatloiaren I. edizioa urriaren 10ean egingo dela jakinarazi dute berriki lasterketaren antolatzaileek. Probak ikusmina sortu du, izan ere 300 pertsonak baino gehiagok eman du izena (izena emateko epea urriaren 4an amaituko da), federatuen kategoriakoak eta kategoria herrikoikoak batuta).

Duatloi sprint distantziako Arabako txapelketa izango da eta ibilbidea Salburua auzoan zehar izango da. Guztira, bost kilometro lasterka, 20 kilometro bizikletan, eta 2,5 kilometro oinez egin beharko dituzte parte hartzaileek. Buesa Arenatik irten eta bi buelta eman beharko zaizkio korrika 2,5 kilometroko zirkuituari. Edonola ere, kontutan hartu behar da pandemiak baldintzatu egin duela lehen edizio honen zirkuitua, batez ere ibilbidea diseinatzeko eta prebentzio-neurriak hartzeko orduan.

Bizikleta gaineko proba sei kilometro baino zertxobait gehiagoko zirkuitu batean egingo da, eta 3 itzuli eman beharko zaizkio. Zurbanoko atearen ingurutik, Hezeguneen ibilbidetik eta Betoñuko industrialdetik igaroko da.

Kategoria herrikoiaren kasuan beste distantzia batzuk izango dira: 2,5 kilometro korrika (buelta bat zirkuituari), 13,4 kilometro bizikleta gainean (zirkuituari bi buelta) eta 2,5 kilometro korrika  (zirkuituari buelta bat), hain zuzen ere.

Federatuen mailan 250 pertsona eta kategoria herrikoian 100 lagunek parte hartuko dutela aurreikusten da, Covid-19ari dagozkion segurtasun-neurri guztiak beteko dituen ekitaldi honetan.

Kategoria herrikoian 10:00etan abiatuko dira, eta federatuak bi ordu beranduago, hau da, 12:00etan. Boxen gunea Buesa Arenaren kupularen azpian egongo da, eta parte-hartzaileak eta akreditazioa dutenak bakarrik sartu ahalko dira bertara. Ekitaldia 14: 00etan amaitzea aurreikusten da.

Lasterketaren informazio guztia bildu dute probaren webgunean.