EUSKAL PILOTA/OFIZIALTASUNA

Euskal Pilotan Euskal Selekzio ofiziala!

by | 2022/10/12

Euskal Pilotan euskal selekzioan aritzeko ofizialtasuna aldarrikatu du Euskal Pilota Selekzioa Kolektiboak Durangon

Munduko Euskal Pilota Txapelketa urriaren 22tik 29ra jokatuko da Biarritzen. Euskal pilotariek txapelketan parte hartzekotan Espainiako zein Frantziako selekzioekin aritzeko behartuko dituzte. Gauzak horrela, Euskal Pilota Selekzioa Kolektiboan batu diren hainbat pilotariek, federazioetako kidek eta agintariek ofizialtasuna aldarrikatu dute egoera horrekin amaitu eta euskal herritar gisa aritzeko aukera izateko.

Durango egindako agerraldian manifestua irakurri dute Endika Barrenetxeak (erremontea), Laura Saezek (gomazko paleta), Ibai Zabalak (esku pilota) eta Iera Agirrek (esku pilota).

“Euskal kirolariok ezin dugu Nazioarteko Euskal Pilota Federazioak antolatzen dituen nazioarteko txapelketa ofizialetan parte hartu Euskal Herriko selekzioarekin. Gure herrian, gurea dugun eta gure izena damaran kirolean hau gertatzea lotsagarria eta penagarria dela deritzogu”.

“Euskal pilotariak garenez, guk Euskal Herriko koloreekin eta gure ereserkiaren doinupean lehiatzea nahi dugu. Hori lortzeko denok batu behar ditugu indarrak”.

“Munduko Pilota Batzarrari eta Euskal Pilota Federazioei eskatzen diegu jarrai dezatela egoera honi irtenbide bat aurkitzeko lanean, eta har ditzatela helburua lortzeko bidean hartu behar diren erabakiak. Euska Herriko instituzioei, berriz, eskatzen diegu jarrai dezatela beraien esku dauden tresna juridiko, politiko eta pertsonalak helburu honetara bideratzen”.

“Dei egiten diegu Euskal Herriko alderdi politikoei eta, batik bat, aldarrikapenarekin bat egiten dutenei, euskal gizartearen gehiengo handi baten ametsa errealitate bihurtzeko urratsak ematen jarrai dezaten”.

Agerraldian pilotaren munduko beste hainbat agintari, agintari ohi eta pilotari batu dira: Itziar Lete, Gipuzkoako Euskal Pilota Federakuntzako lehendakaria; Enaitz Olaeta, Bizkaiko Euskal Pilota Federakuntzako lehendakaria; Iker Gerea, Arabako Euskal Pilota Federakuntzako lehendakaria; Gotzon Embil, Euskadiko Euskal Pilota Federakuntzako lehendakaria; Patxi Jauregi, Euskadiko Euskal Pilota Federakuntzako lehendakari ohia; Kiko Caballero, Euskadiko Euskal Pilota Federakuntzako lehendakari ohia; Jean Michel Garayar, Iparraldeko Bizkaiko Pilota Batzordeko lehendakaria; Maite Ruiz de Larramendi esku pilotaria; Martin Ibarra, Euskal Pilota Konfederazioko lehendakari ohia; Beñat Lizaso pilota egokituko pilotaria; Manuel Quesada, pilota egokituko pilotaria; Nahia Ouro, Bizkaiko Euskal Pilota Federazioko zuzendaritzako kidea eta Naroa Agirre esku pilotaria.