HERRI KIROLAK

Emakumeen Euskal Herriko hainbat herri kirol txapelketa jokatu ziren Mungian

by | 2021/11/14

Argazkiak: egursport.com

Herri kirol hitzordu garrantzitsuak izan ziren pasa den larunbatean, azaroaren 13an, Mungian, non goizeko 11:00etan Matxin plazan hamasei emakume aritu ziren lehian, Euskal Herriko txapelketako lau modalitatetan: txinga-eramatea, lokotx-biltzea, lasto-jasotzea eta ingude-jasotzea.

Lokotx-biltze finalean, Ainhoa Etxegarai zein Ainhoa Iraizoz nafarrak, Arabako Maider Etxezabal (Gipuzkoan ez da lokotx biltze txapelketarik egiten, eta Arabaren izenean parte hartu zuen azpeitiarrak bertako txapelketa irabazi zuelako) eta Zuriñe Frutos eta Bizkaiko Irantzu Onaindia aritu ziren.

Azkenean, Eltsoko Ainhoa Iraizoz izan zen Euskal Herriko txapeldun, 7 minutu eta 34 segundoko denbora baliatu zuelarik 50 lokotxak biltzeko. Bigarren posturako lehia estua izan zuten Maider Etxezabal arabarrak eta Ainhoa Etxegarai beratarrak eta azkenean segundo bakarrarengatik gailendu zitzaion Etxezabal (7.51) Etxegarairi (7.52). Irantzu Onaindia bizkaitarra laugarren izan zen (8.28) eta Zuriñe Frutos arabarra bosgarren (8.43).

Euskal Herriko ingude-jasotze txapelketan Karmela Gisasola bizkaitarra izan zen onena, 95 jasoaldi eman zizkiolarik hamar kiloko ingudeari. Maika Ariztegi iturendarra bigarren izan zen 93 jasoaldirekin eta Lucia Orbe bizkaitarrak osatu zuen podiuma, 89 jasoaldirekin. Nerea Sanz bizkaitarra laugarren izan zen (82 jasoaldi), Silvia Meseguer bizkaitarra bosgarren (80 jasoaldi), Amaia Mendinueta  seigarren (77 jasoaldi) eta Iraide Gezuraga zazpigarren (71 jasoaldi).

Txinga-eramate txapelketan aldiz, bi bizkaitar aritu ziren lanean. Garazi Arruti nagusitu zen, 40 plazarekin eta Nerea Egurrola bigarren izan zen (33 plaza eta laurden eta 76 zentimetro).

Azkenik, lasto-jasotze txapelketan, bi arabar lehiatu ziren. Garbiñe Lopez de Uralde izan zen txapeldun, 29 altxaldirekin eta Ruth Linaza bigarren, 21 altxaldirekin.

Ingude txapelketa (10 kilo-1´30´´)

1 Karmele Gisasola “Zelai III.a”  95 jasoaldi

2 Maika Ariztegi  93 jasoaldi

3 Lucia Orbe  89 jasoaldi

4 Nerea Sanz  82 jasoaldi

5 Silvia Meseguer  80 jasoaldi

6 Amaia Mendinueta  77 jasoaldi)

7 Iraide Gezuraga   71 jasoaldi

Txinga eroate txapelketa (25 kilo)

1 Garazi Arruti 40 plaza

2 Nerea Egurrola 33 plaza-1/4-0,76 m.

Lokotx-biltze txapelketa

1 Ainhoa Iraizoz  7´34´´

2 Maider Etxezabal  7´51´´

3 Ainhoa Etxegarai  7´52´´

4 Irantzu Onaindia  8´28´´

5 Zuriñe Frutos  8´43´´

Lasto-altxatze txapelketa (30 kilo-2 minutu)

1 Garbiñe Lopez de Uralde  29 jasoaldi

2 Ruth Linaza  21 jasoaldi