HERRI KIROLAK/AIZKORA

Bihar jokatuko da Otxandion Euskal Herriko hirugarren mailako aizkora txapelketaren finala

by | 2019/12/13

Argazkia: erran.eus/

Euskal Herriko hirugarren mailako aizkora txapelketaren finala jokatuko da larunbat honetan, abenduak 14, 17:30ean hasita Otxandioko Mañondoko pilotalekuan

 

Sei aizkolari ariko dira nor baino nor gehiago, tartean hiru nafar eta araba, bizkaia eta gipuzkoako ordezkari bana, aizkolari bakoitzak orotara 5 enbor ebaki beharko dituelarik, 54 ontzako hiru enbor eta 60 ontzako bi.

Udako lehiaketetan izan ziren kanporaketetan oinarrituta lortu ziren postuak finalean lehiatzeko, Ezkurran abuztuak 17an, Gatikan abuztuak 25ean eta Irurtzunen irailaren 25ean egindako txapelketetan, hain zuzen ere. Bakoitzean lehen bi postuetan sailkatutako aizkolariek lortu zuten final honetara heltzea.

Dena den, Xabier Orbegozoren ordez Ezkurrako kanporaketan hirugarren postuan sailkatu zen Julen Aranberri hartuko du parte asteburuan, aurrekoa min hartuta dagoelako tamalez.

Hori horrela, finalean arituko diren sei aizkolariak hurrengoak dira: Eneko Saralegi, Txomin Amundarain eta Goizeder Belza naparrak, Luis Mari Polanco arabarra, Julen Aranberri gipuzkoarra eta Ioritz Gisasola bizkaitarra. Ilusioz beterik ailegatuko dira seirak biharko lehiara eta beraz esan daiteke ez dagoela faborito garbirik, paretsu ariko direnaren ustea baitago.

3. mailako txapela lehian egoteaz aparte, biharko Otxandioko txapelduna eta txapeldunordea Euskal Herriko aizkorako bigarren mailara igoko dira datorren urtean.

Bestalde, egunotan ere, beste herri kirol jardunaldia izango da Bizkaian bertan. Astelehenean, abenduaren 16an, Euskadiko Idi Proba Txapelketa ospatuko da Abadiñoko probalekuan, gaueko 21:00etatik aurrera. Garagartza Elkartea, Arene Jatetxea eta Taberna Goieta izango dira parte-hartzaileak, Euskadiko Herri Kirol Federakundeak antolaturiko ekitaldian.